Բացահայտիր Արագածոտնը - Գեղարոտի ջրվեժ. Արագածի սառնորակ գեղեցկուհին
Գեղարոտի ջրվեժը Հայաստանի հիասքանչ բնական հուշարձաններից մեկն է, որն իր գեղեցկությամբ հաճախ համեմատվում է հայտնի Թռչկան ջրվեժի հետ:
Այն գտնվում է Արագածոտնի մարզում՝ Արագած լեռան լանջին, ծովի մակերևույթից մոտ 3000 մետր բարձրության վրա:
Այս բարձրադիր ջրվեժը գոյանում է Քասաղ գետի Գեղարոտ վտակի վրա։
Տեղանքը հասանելի է Արագած գյուղից, որից գտնվում է մոտ 11-12 կմ հեռավորության վրա դեպի հյուսիս-արևմուտք:
Այս բնական օբյեկտը հատուկ պահպանվող տարածք է և ընդգրկված է Հայաստանի Հանրապետության բնության պետական հուշարձանների ցանկում:
Այն պաշտոնական կարգավիճակ է ստացել համաձայն ՀՀ կառավարության 2008 թվականի օգոստոսի 14-ին ընդունված որոշման:
Ջրվեժն ունի մոտ 17 մետր բարձրություն, որտեղից գահավիժում են նրա սառնորակ ջրերը:
Տեղանքի բարձրադիր դիրքն ու կլիմայական պայմանները թելադրում են ջրվեժի վարքագիծը տարվա եղանակներին. ամռանը այն ներկայանում է իր ողջ հզորությամբ ու զովությամբ, իսկ ձմռանը լիովին սառչում է՝ ստեղծելով տպավորիչ սառցե տեսարան:
Լինելով Արագածի լանջերի զարդը՝ այն զբոսաշրջիկների և բնության սիրահարների սիրված ուղղություններից մեկն է:
Կոորդինատներն են՝ 40°30'07"N 44°12'28"E: