Բացահայտիր Արագածոտնը- «Ճգնավորի այր» քարայր-կայարան
Հայաստանի հարուստ պատմամշակութային ժառանգության մեջ առանձնահատուկ տեղ են զբաղեցնում քարանձավային համալիրներն ու ճգնարանները, որոնք դարեր շարունակ ծառայել են որպես հոգևոր կենտրոններ և ապաստարաններ։
Այդպիսի արժեքավոր հուշարձաններից է Արագածոտնի մարզի Օրգով գյուղի մոտակայքում գտնվող «Ճգնավորի այր» քարայր-կայարանը, որը թվագրվում է 13-14-րդ դարերով։
Այս ուշագրավ պատմական վայրը թաքնված է Ամբերդի գեղատեսիլ ձորում՝ բնական ժայռերի ու հարուստ բուսականության համադրությամբ։
Քարայրն իրենից ներկայացնում է ժայռափոր համալիր, որն անցյալում օգտագործվել է ճգնավորների կողմից՝ աշխարհիկ կյանքից մեկուսանալու, աղոթելու և հոգևոր կատարելության հասնելու նպատակով։
Այս պատմական կառույցը գտնվում է երբեմնի «Ղազարի ձոր» գյուղատեղիի դիմացի հատվածում։ Ձորի բնական դիրքը և դժվարամատչելիությունը միջնադարում ապահովել են անհրաժեշտ անդորրն ու անվտանգությունը։
Այսօր այն հանդիսանում է հրաշալի ուղղություն պատմության, հնագիտության և արշավային տուրիզմի սիրահարների համար, ովքեր ցանկանում են բացահայտել Հայաստանի քիչ հայտնի, բայց հիասքանչ անկյունները։
Տեղակայում՝ Հայաստան, Արագածոտնի մարզ, Օրգով գյուղից 2 կմ հարավ, Ամբերդի ձոր, «Ղազարի ձոր» գյուղատեղիի դիմաց։
Կոորդինատներ՝ 40.2858° N, 44.2264° E