Ճանաչենք Արագածոտնի մարզի մեծերին - Նորայր Սիմոնյան

Նորայր Հմայակի Սիմոնյանը հայ խորհրդային կինոօպերատոր և ռեժիսոր է, ՀԽՍՀ արվեստի վաստակավոր գործիչ (1962 թվական)։

Ծնվել է 1909 թվականի դեկտեմբերի 10-ին Աշտարակում (Ռուսական կայսրության Երևանի նահանգի Էջմիածնի գավառ)։

1935 թվականին ավարտել է Մոսկվայի Գերասիմովի անվան կինեմատոգրաֆիայի ինստիտուտը և նույն թվականից աշխատանքի անցել որպես «Հայկինոյի» ռեժիսոր։

​Իր ստեղծագործական գործունեության ընթացքում Նորայր Սիմոնյանը նկարահանել է 60-ից ավելի վավերագրական ֆիլմեր։

Դրանցից նշանավոր են «Խնդության երկիր» (1940 թ.), «Երկիր հայրենի» (1945 թ., Ժ․ Գ․ Վարդանյանի և Գ․ Ն․ Արամյանի հետ համատեղ), «Պայքար հացի համար» (1951 թ.), «Մարտիրոս Սարյան» (1961 թ.) և «Ալեքսանդր Շիրվանզադե» (1975 թ.) ֆիլմերը։

​Վավերագրական աշխատանքներից զատ, նա հեղինակել է նաև գեղարվեստական ֆիլմեր, որոնց թվում են «Մանրուք» (1953 թ.) և հայտնի «01-99» (1959 թ.) ֆիլմերը։

​Նորայր Սիմոնյանը կյանքից հեռացել է 1988 թվականի հունվարի 1-ին Երևանում։