Ճանաչենք Արագածոտնի մարզի մեծերին- Նազար Ալբարյան
Նազար Սարգսի Ալբարյանը ազատ ոճի հայ և ԽՍՀՄ ըմբշամարտիկ է եղել, ԽՍՀՄ չեմպիոն և միջազգային կարգի ԽՍՀՄ սպորտի վարպետ։ Ծնվել է 1943 թվականի մայիսի 4-ին Արագածոտնի մարզի Փարպի գյուղում։ Սպորտային բարձրագույն կրթություն է ստացել՝ ավարտելով Երևանի ֆիզիկական կուլտուրայի հայկական պետական ինստիտուտը։
Ըմբշամարտով սկսել է հետաքրքրվել ու ակտիվ պարապել 1959 թվականից։ Նրա մարզական վերելքն ու հաջողությունները չուշացան․ 1961 և 1962 թվականներին դարձել է ԽՍՀՄ երիտասարդության առաջնության կրկնակի հաղթող։ Արդեն 1962 թվականին նա լրացրել է ԽՍՀՄ սպորտի վարպետի նորմը, 1967 թվականին արժանացել միջազգային կարգի ԽՍՀՄ սպորտի վարպետի կոչմանը։ 1962-1971 թվականների ընթացքում մասնակցել է վեց ազգային առաջնությունների։
Ալբարյանի մարզական կարիերայի գագաթնակետերից էր 1967 թվականին ԽՍՀՄ ժողովուրդների սպարտակիադայի չեմպիոն դառնալը, ինչպես նաև 1968 թվականին Մեխիկոյում անցկացված Ամառային Օլիմպիական խաղերին մասնակցությունը, որտեղ նա ներկայացրել է երկիրը ամենաբարձր մակարդակով։
Անվանի մարզիկը կյանքից հեռացել է 2021 թվականի մարտի 30-ին՝ 77 տարեկան հասակում՝ թողնելով հարուստ մարզական ժառանգություն և անջնջելի հետք հայկական ըմբշամարտի պատմության մեջ։