Բացահայտիր Արագածոտնը- Ոսկեվազի Գինու Գործարան
«Ոսկեվազ» գինու գործարանը գտնվում է Արագածոտնի մարզի համանուն Ոսկեվազ գյուղում՝ Քասախ գետի գեղատեսիլ կիրճի եզրին:
Հայաստանի ամենաբարձր լեռան՝ Արագածի մերձակայքում գտնվող այս տարածքն ունի գինեգործության հնագույն պատմություն և իր մեջ կրում է հայկական քաղաքակրթության զարգացման նախկին ժամանակաշրջանների շերտերը:
Գործարանից ընդամենը մի քանի կիլոմետր հեռավորության վրա, Քասախի կիրճի եզրին են գտնվում 5-7-րդ դարերում կառուցված «Բադալի ժամ» եկեղեցու ավերակները:
Մոտակայքում հայտնաբերվել են հողի մեջ թաղված կարասների մնացորդներ, որոնց մեջ հնում գինի էին պահում:
Գործարանը հիմնադրվել է դեռևս 1932 թվականին: Բոլոր ժամանակակից նորարարությունների հետ մեկտեղ, այն զգուշորեն պահպանել է իր վավերական տարրերի մեծ մասը, ներառյալ պատմական շենքերը:
Գործարանն իր վերածնունդն ապրեց 2004 թվականին, երբ ռուսաստանցի գործարար Դավիթ Հովհաննիսյանը տեղափոխվեց Հայաստան և հիմնադրեց «Ոսկեվազի Գինու Գործարան» ՍՊԸ-ն՝ այն վերածելով յուրօրինակ զբոսաշրջային համալիրի:
Այսօր «Ոսկեվազը» ստեղծում է գինիներ, որոնք արտադրվում են ինչպես ժամանակակից գինեգործական մեթոդներով, այնպես էլ օգտագործելով 19-րդ դարավերջին ստեղծված հնօրյա ավանդական կարասները: Կարասը՝ գինու խմորման և հնեցման այս ավանդական գործիքը, Հայաստանում կիրառվում էր դեռևս հնում:
Գործարանի առանձնահատուկ հպարտությունն են 19-րդ դարի կարասներում ստեղծված գինիները, որոնք մինչ օրս կրում են հին գինեգործության գաղտնիքները:
«Ոսկեվազի» գինիներն առանց բացառության արտացոլում են Հայաստանի իրական բնույթը. արտադրության մեջ օգտագործվում են միայն տեղական խաղողի տեսակները, իսկ հնեցման համար կիրառվում են հազվագյուտ, բարձրորակ հայկական կաղնուց պատրաստված տակառները:
Քաղցր գինիների արտադրության մեջ «Ոսկեվազի գինու գործարանը» առաջինն է, որ օգտագործել է խաղողի թառամեցման մեթոդը:
Էքսկուրսիան դեպի գործարան վերածվում է գրավիչ ճանապարհորդության, որտեղ այցելուները շրջում են ստվերոտ գինու մառաններով, ծանոթանում գործարանի պատմությանը և բացահայտում, թե ինչպես են ծնվում հայկական հողի հոգին արտացոլող գինիները:
Յուրաքանչյուր գինի բացահայտում է իր բնավորությունը՝ թեթև թարմությունից մինչև հնեցում:
Որակը պարբերաբար բարելավելու, արտադրության տեխնոլոգիաները կատարելագործելու և ամեն տարի տեսականին ընդլայնելու շնորհիվ՝ «Ոսկեվազ» գինիներն արժանացել են բազմաթիվ մրցանակների միջազգային հեղինակավոր մրցույթներում, ինչպիսիք են «Mundus Vini», «Decanter World Wine Awards», «Sommelier Wine Awards» և այլն:
Տեղակայում՝ Հայաստան, Արագածոտնի մարզ, Ոսկեվազ գյուղ, 8-րդ փողոց, շենք 19
Կոորդինատներ՝ 40.2808° N, 44.2940° E (40°16'51" N, 44°17'38" E)
Լուսանկարը `Հատիս Տուր-ի