Ճանաչենք Արագածոտնի մարզի մեծերին-Հարություն Չալիկյան
· Աշտարակ
Հարություն Գրիգորի Չալիկյանը (ծնվել է 1943 թվականի սեպտեմբերի 5-ին, Աշտարակ, Հայկական ԽՍՀ, ԽՍՀՄ) հայ ճարտարապետ է, ծաղրանկարիչ և քանդակագործ: Նրա աշխատանքները ցուցադրվել են Փարիզում, Նյու Յորքում, Մոսկվայում, Քեմբրիջում, Երևանում և այլ քաղաքներում, և նա մի շարք միջազգային պարգևների դափնեկիր է:
Հոկտեմբերի 27-ին Հայաստանի նկարիչների տան մեծ ցուցասրահում բացված Չալիկյանի հոբելյանական անհատական ցուցահանդեսին ներկայացված էին 120-ից ավելի ծաղրանկարներ, քանդակներ և մեդալներ, այդ թվում՝ Շառլ Ազնավուրի, Սերժ Թանգյանի, Վլադիմիր Պուտինի, Դոնալդ Թրամփի, Թերեզա Մեյի, Հռոմի պապ Ֆրանցիսկոսի, Անգելա Մերկելի, Օհան Դուրյանի, Քրք Քրքորյանի, Եղիշե Չարենցի, Սերժ Սարգսյանի և շատ ուրիշ հանրահայտ դեմքերի:
«Իմ ծաղրանկարները ծաղրելու նպատակ չունեն։ Դրանք ցույց են տալիս իմ հերոսների բնավորությունն ու ներքին էությունը։ Այդ պատճառով ես դրանց հաճախ վերաբերվում եմ ինչպես հոգեբանական դիմանկարների», – ասում է հեղինակը: Նա նաև հումորային, դիպուկ երկտողեր է գրել իր յուրաքանչյուր հերոսի մասին՝ դրանցում միաժամանակ արտահայտելով քաղաքական և սոցիալական խնդիրների շուրջ իր սուր մոտեցումները:
Բացի ծաղրանկարներից ու քանդակներից, Հ. Չալիկյանը Հայաստանի ոսկու գործարանի հետ համագործակցությամբ ստեղծել է նաև ոսկե մեդալների 2 հավաքածու. առաջինը՝ Մեծ ությակի երկրների նախագահների, երկրորդը՝ հայտնի ֆուտբոլիստների պատկերներով: Այդ հավաքածուները 2017 թվականին ցուցադրվել են Գերմանիայում, Ռուսաստանում և այլ երկրներում:
1962-1969 թվականներին սովորել է Երևանի պոլիտեխնիկական ինստիտուտի ճարտարապետաշինական ֆակուլտետում:
1985 թվականին ծաղրանկարների միջազգային մրցույթի դափնեկիր է՝ արժանացել է արծաթե պնակ մրցանակի (Անկորա, Իտալիա):
1975 թվականից Հայաստանի ճարտարապետների միության անդամ է:
1997 թվականից՝ Հայաստանի դիզայներների միության անդամ է:
1999 թվականից՝ Հայաստանի նկարիչների միության անդամ է:
2003 թվականից՝ Հայաստանի ծաղրանկարիչների միության անդամ է:
Անհատական ցուցահանդեսներն են․
1993, 1994 - Մոսկվա, Ռուսաստան
1996 - Նյու Յորք, ԱՄՆ
1999 - Բեյրութ, Լիբանան
1995, 2002, 2003, 2013 - Երևան, Հայաստան
2011 - Քեմբրիջ, Մեծ Բրիտանիա
2013 - Փարիզ, Ֆրանսիա
2017 - Եղիշե Չարենցի տուն-թանգարան
2018 - Գևորգ Գրիգորյանի տուն-թանգարան
Մեջբերումներ Հարություն Չալիկյանից.
«Իմ բոլոր ծաղրանկարներին խնամքով եմ վերաբերվում, որովհետև ես չեմ ծաղրում։ Նրանց մեջ ավելի շատ խորքային բաներ կան. բնավորության գծերի արտահայտում»: